على فكرة فى لعبة حلوة اوى بتوسع الادراك الداخلى للانسان وهى انك ترسم 10 دواير وتبداترسم حاجة توضح شكل الدايرة دى ممكن تعمل قرص شمس او وردة او عجلة عربية او اى حاجة وتكررها مع زيادة عدد الدوائر وتنويع الاشكال وعدم تكرارها واحسب الزمن هتلاقى انك كل مرة بتبقى اسرع من اللى قبليها

اللعبة دى كمان بتزيد من مرونة عقل الانسان فى التفكير وجربها وشوف

ازيكم يا شباب ايه الاخبار
معلش على التاخير اعتقد انتوا حفظتوا خلاص السبب وهو مشاغل الدنيا
ها يا جماعة حد جرب الكلام بتاع المرة اللى فاتت عملى؟
على فكرة انا نسيت حاجة مهمة المرة اللى فاتت وهى حقيقة علمية بتقول ان الدراسات اثبتت انه لو عندك مثلا شخص ا نسبة ذكاءه اقل من الشخص ب لكن الشخص ا اذا كان بينمى مهاراته بنسبة اكبر من الشخص ب بيكون الشخص ا هو الاكثرفاعلية واكثر تاثيرا ايجابيا بل واكثر نجاحا من الشخص ب
واصلا مقولة انه فلان دة غبى وفلان دة ذكى خاطئة لانه محدش اتولد غبى بس الذكاء بيكون بنسب
نرجع بقى لبقية قواعد التفكير السليم
القاعدة التانية اسمها اعتبار كافة العوامل
ودة معناه انه الواحد لما يجى ياخد قرار لازم يفكر فى كل شىء متعلق بالقرار دة وايه اللى هيترتب عليه لو وافقت
وايه اللى هيحصل لو رفضت
وخلى بالك لازم وانت بتفكر تحط فى دماغك الاربع دواير اللى اتفقنا عليهم المرة اللى فاتت وهما على الترتيب
1- الله
2-المجتمع
3- الاهل
4- النفس
وهندى امثلة عشان محدش يقول مش فاهم ومش عارف اطبق عملى ازاى
مثال 1: لو عرض عليك شراء عربية مستعملة هل ستوافق ام لا؟
اوعى تتسرع فى الرد اقعد هات ورقة وقلم وفكر مع نفسك شوية بصوت عالى وبعدين جاوب
وانا هغششكم شوية اهه
اولا فى شوية عوامل لازم نراعيها وحاجات لازم نسال عنها عشان نحدد على اساسها السلبيات والايجابيات
يعنى مثلا: نوع العربية وماركتها ايه؟شغالة بقالها كام سنة؟
موديل كام؟ هدفع فيها كام؟الماتور اخباره ايه؟
فيها حاجة بايظة ولا لا؟اخبار رخصتها ايه؟متأمنة ولا لا؟
قطع الغيار متوفرة وكويسة ولا كله صينى والسلام او ممكن يكون مش متوفر بالسوق اصلا؟
هل انا اصلا حالتى الاجتماعية والثقافية ومركزى يسمحلى بشراء عربية مستعملة وقديمة ولا لازم كله جديد فى جديد؟
وكدة بقى نقدر نطلع السلبيات والايجابيات من اجابة الاسئلة دى وطبعا فى اسئلة تانى كتير بس انا بديكم المفتاح بس
مثال 2: قابلت واحد فى دراستك او عملك هل ممكن يبقى صديقك (انتيمك يعنى)؟
اوعى تتسرع فى دى بالذات لاحسن تروح فى ........
لازم الاول تحدد مع نفسك ايه الصفات اللى عايزها فى انتيمك عشان تقدر تحكم على الشخص دة
يعنى مثلا: هو امين ولا لا؟ متدين وملتزم ولا لا؟
بيبر اهله ولالا؟ عندة طموح ولا لا؟
صادق ولا لا؟ صريح ولا خبيث؟
مستواه الدراسى او الثقافى ايه؟
مستواه الاجتماعى والمادى ايه؟
تعرفوا لما اتقال لنا السؤال دة فى الكورس واحد من الولاد قال اهم حاجة انه ميكونش بيسمع لعمرو خالد حتى انا كان نفسى اناقشه واعرف ايه السر فى كدة بس قولت بلاش لاحسن نعمل فتنة طائفية فى البلاد ولا حاجة
مثال كمان( بس دة انتوا بقى اللى هتحللوه وتطبقوا عليه القاعدتين اللى اخدناهم)
عند اختيارك مهنة ما او تخصص فى الدراسة ما هى العوامل التى يجب اخذها بعين الاعتبار عند الاختيار؟
اتفضلوا يا جماعة اللينك دة بيتكلم عن الكورت بشكل اوسع شوية بس انزلوا لاخر الصفحة عشان هو تحت شوية
http://forum.amrkhaled.net/showthread.php?t=190907

السلام عليكم يا جماعة معلش اتاخرت عليكم شويتين بس انتو ا عارفين الدنيا مشاغل

المهم كنا بدأنا كلام عن دورات الكورت وقولنا انها كورسات بتدرس لتعليم كيفية التفكير السليم واول حاجة لازم نتعلمها اننا نفكر فى قرار او اختيار جيدا ولا نتسرع فى الحكم على الاشياء فلابد من التفكير فى سلبيات وايجابيات كل موضوع على حدة وكنا بنعمل حاجة حلوة فى الكورس دة كنا بناخد موقف معين ونمسك ورقة وقلم ونقسم الصفحة نصفين ونكتب فى النصف الايمن الايجابيات وفى الايسر السلبيات

وبنحاول نعصر دماغنا بحيث يكون عدد السلبيات مساوى تقريبا لعدد الايجابيات وهنا يظهر سؤال مهم

طيب وانا هاخد القرار ازاى طالما السلبيات زى الايجابيات فى العدد؟

والاجابة هى انه الموضوع لسه مانتهاش دة احنا يا دوب بنبدأ

اصل فى 4 دوائر لازم نفكر على اساسهم وهم

1- الله

2-المجتمع

3-الاهل

4-النفس

ويصف علماء النفس هذه الدوائر بأنها دائرة كبرى تحت لفظ الجلالة الله ويتوسطتها دائرة الانا اى النفس

ثم بعد ذلك يتخللهما دائرتى المجتمع والاهل

عايزين نطبق الكلام دة عملى يا جماعة يعنى نختار شوية مواقف ونخرج سلبياتها وايجابياتها ومع التمرين هنلاحظ اننا بقينا اسرع وعقلنا بدأ يبقى مرن اكتر فى التفكير.

ملحوظة: من اولى القواعد الاساسية فى الكورت انك لازم تؤمن بأن اى انسان على وجه الارض مهما كان هو مين او عايش فين او ايه ظروفه يستطيع ان يطور من نفسه وان يغير من طريقة تفكيره للاحسن بس عليه باتخاذ الاسباب للتغيير دة

فان الله لايغير ما بقوم حتى يغيروا ما بأنفسهم

والمرة الجاية ان شاء الله نكمل بقية قواعد التفكير السليم

لكن احب اقولكم مقولة ل الدوس هوكسلى " هناك جانب واحد فقط فى هذا الكون يمكنك ان تكون على ثقة من تحسينه الا وهو ذاتك"

السلام عليكم ورحمة الله وبركاته

نبدأ باذن الله اول كلامنا مع بعض وان شاء الله هيكون مفيد ومش هيقتصر على موضوع واحد لكنباذن الله نكلم عن حاجات كتير ويا رب تكون مفيدة لينا كلنا بس عايزين نتفق على الصراحة من الاول واللى عايز اى حاجة يقول ميتكسفش.

ايه رايكم نبدأ مع تعريف حاجة اسمها كورسات الكورت يمكن ناس كتير ميعرفوش حاجة عنها انا كمان كنت كدة لحد وقت قريب

دى يا جماعة كورسات بتتكلم عن كيفية التفكير وبتعلمنا ازاى نعمل تفكير سليم نراعى فيه كل الجوانب علشان ما نتفاجأش بالمشاكل بعد اتخاذ القرارات.

على فكرة الكورسات دى بدايتها كانت فى الغرب وكانت عقيمة جدا اول ما ظهرت بس بعد فترة طويلة بدأوا العلماء والباحثين يطوروا فيها لحد ما بقت بشكلها النهائى الجميل دة.

وبمناسبة الصيف والحر اللى احنا فيه دة ممكن تصيف معانا من غير ما تسافر ولا حاجة

وادينا بدأنا مع اول موجة بس ان شاء الله مفيش دوامات ولا قناديل.